ولا ف الاحلام :)

بناء علي طلب مامتي ^^

"مامة مازن"
كان لازم البي الدعوة بس معلش أتأخرت شوية


يمكن الاحلام يمكن تكون صعبة ؟؟


يمكن محتاجة وقت ... مش عارفه :D

ونقول أكشن أذكر خمس أحلام على الاقل ..تخص ماضيك ..؟؟

1)يمكن وانا صغيرة وبضفاير كان تعبيري عن الاحلام طفولي اوي


كنت عاوزة ابقي مُدرسة :) علشان مش هضرب العيال لما ميعملوش الواجب :))

وكنت عاوزة ابقي دكتورة عشان مش هكتب حق ف الروشتة ^^

2) حلمت اني اخلص الثانوية العامية بمجموع كبييير

وحصل طبعا ....... ههههههه

3) حلم إني الاقي الحب ال بجد بس عمري مالقيته ولا هو لقاني

4) حلمت اني يكون عندي اطفال كتيير اوي بس طبعا حلم غير قابل للتحقيق ^^

هجيبهم امتي ده اولا و ثانيا العصرال احنا فيه ده

لو ربيت فيه 2 او 3 كويس واهتميت بيهم يبقي ربنا معايا

5) بحلم اني الاقي نفسي وأكتشفني .... الحلم الهولامي (:

خمس احلام ع الاقل تخص مستقبلك؟؟

1) نفسي احج أو أعمل عمرة اوي حاسة انها هتقربني اوي من ربنا

عاوزة اروحله اوي ابقي ف بيته عارفة ساعتها ان اللحظة دي
اي حاجة ف الدنيا مش هتوازيها

2) نفسي تفكيري يوسع اوي وميبقالوش حدود

لاني بحس ان الانسان ال بيعيش وخلاص من غير مايفكر

ولا يوسع مدراكة بتبقي نهايته للتفاهة وانا عمري ما هحب نفسي لما هكون تافهة او مهمشة

وأني أحقق نفسي أأمن بقدراتي عشان أفجر كل الطاقات ال جوايا

3) بحلم إني الاقي إنسان احس معاه بالامان ....

استخبي فيه وانا مش خايفه من خنجر مخبيه ورا ضهره ليا

يعيني اني اكون احسن ف كل حاجة وأولهم طاعة ربنا

4) بحلم ..... اممممممممممم


بمريم (:


متستغربوش دي بنتي ^^ بحلم بيها دايما وانا نايمة بس مجتليش من زمان :(


بتكون ف الحلم زي القمر وعنيها ملونة وشعرها طويل وجمييلة :))


مستنياها اوي ... وبحبها اوي بس مش عارفه اذا كانت هتيجي ولا لا ...


بس سواء جت او مجتش فأنا بحبها


دي بنت قلبي ويمكن أجمل حلم وأكبر حلم بحلمه ...


سعات بيبقي نفسي احضنها اوي بس حتي ف الحلم مش بعرف احضنها :((


5) بحلم اني أتخلي عن براءة بتقودني دايماً للسذاجة


أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ?


اممممم آدم ابن أخويا عشان ده حبيب قلبي حته مني اصلا


اول لما اتولد مقدرتش اشيله لاني مكنتش قادرة اتلم علي اعصابي :)



كنت خايفه اي لمسه لما المسه توجعه كان مغمض عنيه اوي وفجأة فتحهم وفضل يبصلنا بيهم :)


وطبعا والدي ووالدتي وأخواتي عيب عليه مش اقولهم يعني هههه


وطبعا مدونتي وكل ال بحبهم وبحسهم اخواتي وأكتر
- أذكر شخصين على الأقل غير متواجدين فى حياتك حاليا كنت تود وجودهم الان او فى حياة

اولادك مستقبلا .. جدي وجدتي اللهم ارحمهم واسكنهم فسيح جناتك وأدخلهم مدخل صدق

كانوا حاجة كبيرة اوي ف حياتي وأكيد كانوا هيبقوا ف حياة ولادي

بس هي دي أحلامي ولو إنها مش كلها .... يمكن الاحلام اصلا مالهاش حدود أو نهاية

طبعا التاج بهديه

امممم لميمايا حبيبة قلبي

ولصاصا بيه فرحات افندي

وموني الشريف ال وحشاني موووت :))

ووووو واي حد ليه مزاج التاج هيجي علي قده يتفضل ياخده ^^